MALBONO

“Principiis obsta”. – OVIDIO (*)

Se vi ne volas aŭdi la parolon 

De via konscienco, venos pento; 

Ne lasu kreski ĉe tritiko lolon, 

Venteg’ ekblovos el semita vento.

Forpuŝu frue ĉiom da inklino 

Al forlogiĝoj de sensperta koro; 

Ne bona estos certe ĝia fino, 

Plezur’ minuta – jaroj de doloro. 

Ni scias, homo estas tro malforta, 

Por kontraŭstari kantojn de sirenoj... 

Konsil’ ne ĉiam estas fruktoporta, 

Predikoj en dezerto, vanaj penoj... 

Rezistu al malbon’ en la komenco: 

Jam ĝin konsilis saĝa Ovidio; 

Admonas tiel same konscienco 

– Herold’ interna de la voĉ’ de Dio! 

10/8/1961  / A. DOMBROWSKI 

Libro: Mediuma Poemaro.

Porto Carreiro Neto.

(*) Latina esprimo, el Ovidio - Kontraŭstaru de la komenco. La poeto konsilas kontraŭstaron al pasioj ekde ties naskiĝo, por ke ili ne enradikiĝu.